გამოკვებე შენი ზაზუნა კარგად, მაგრამ დაცლილი ჯამის მუდმივად შევსება აუცილებელი არ არის. ზაზუნები ძალიან ენერგიული ცხოველები არიან. შესაბამისად, მუდმივად სჭირდებათ ენერგიის წყარო, თუმცა ეს არ ნიშნავს იმას, რომ გამუდმებით, ზედმეტი დოზით უნდა იკვებოს. წინააღმდეგ შემთხვევაში ზაზუნა ძალიან გასუქდება.

რამდენი?

გრანულები ან მარცვლეული 1 სუფრის კოვზი დღეში საკმარისია. იმ შემთხვევაშიც კი, თუ ზაზუნა ძალიან პატარა ზომისაა, რადგან ძალიან აქტიურები არიან და ბევრ კალორიას საჭიროებენ.

მწვანილი მცირე რაოდენობით პლუს ცოტაოდენი ყვავილოვანი კომბოსტო, დაჭრილი ვაშლი და რამდენიმე ქიშმიში დღეში ერთხელ საკმარისია. საკვები მცირე რაოდენობით, ნაწილ-ნაწილ გაუნაწილე მთელი დღის განმავლობაში, რათა თავიდან აიცილო საკვების გაფანტვა.

შედარებით მაგარი საკვები, როგორიცაა ხეხილის ტოტები, ძაღლისთვის განკუთვნილი პატარა ბისკვიტები, ან სპეციალური საკვები სასურველია კვირაში ერთხელ. ზაზუნებს, ისევე როგორც სხვა მღრღნელებს კბილები მუდმივად ეზრდებათ, შესაბამისად აუიცილებელია მუდმივად ჰქონდეთ საღრღნელი ნივთი.

ასევე, გაითვალისწინე, რომ ზაზუნებს ჩვევად აქვთ საკვები ჯამიდან სხვაგან გადაიტანონ, დაცლილი ჯამი არ ნიშნავს იმას, რომ საკვები არ აქვთ, ამიტომ ხშირად ნუ შეუვსებ.

როდის?

საუკეთესო დრო ზაზუნების კვებისთვის არის:

• საღამო – საღამოობით კვება ემთხვევა მათ ძილისწინა აქტიურობას.

ან…

• დილა – დილით კვება ხელს უწყობს მათი დღის ენერგიულად დაწყებას, თანაც ისინი თავად აკონტროლებენ როდის მიირთვან საკვები. ზაზუნები წახემსების მოყვარულები არიან : )

რომელი დროც არ უნდა შეარჩიო, გაითვალისწინე, რომ მათ მუდმივად უნდა ჰქონდეთ წვდომა წყალსა და საკვებზე.
მათი კვება მხოლოდ საჭმლის დადგმით არ შემოიფარგლება.

რამდენიმე რამ რაც უნდა გაითვალისწინო:

კვებისთვის გამოიყენე მცირე ზომის ჯამი. დიდი ჯამი დიდ ადგილს იკავებს გალიაში და თანაც ზედმეტად კვებავ.

• საკვები ჯამის არჩევისას უპირატესობა მიანიჭე კერამიკას, რადგან კერამიკა მეტად გამძლეა, არ იღეჭება და რთულია მისი გადაყირავება. თანაც უფრო ეკონომიურია, რადგან ადვილად არ ზიანდება და მისი შეცვლაც უფრო იშვიათადაა საჭირო.
• საკვები კუთხე ზაზუნების ტუალეტისგან შორს უნდა იყოს (ტუალეტისთვის ადგილს ზაზუნები თავად ირჩევენ და მუდმივად ამ ადგილით სარგებლობენ).
• ხშირად ზაზუნები საკვებით პირს იტენიან და ასე გადააქვთ წინასწარ შეგულებულ ადგილას, რათა მოგვიანებით იკვებონ. ამიტომ, ყურადღება მიაქციე სად და როდის მოათავსე საკვები.
• საკვების ჯამი ყოველკვირეულად გარეცხე საპნიანი წყლით და კარგად გაამშრალე.

უფრო კონკრეტულად, თუ რისი მიღება შეიძლება ზაზუნებისთვის და რისი არა, ჩვენს შემდეგ სტატიაში გეტყვით.