ძაღლის ასაკი და კვება

შენს ძაღლს ასაკი ემატება და უფრო ზანტი ხდება? ან / და აქამდე გემრიელად მიირთმევდა, ახლა კი საჭმლის მიმართ ინტერესი დაკარგა? ყურადღება მიაქციე მის წონას. როდესაც ცხოველს ასაკი ემატება, მისი ჩვევები კვებასთან დაკავშირებით იცვლება და შესაბამისად საჭიროა შეცვალო ის საკვები, რითიც აქამდე იკვებებოდა. ვეტერინარები გვირჩევენ, თუ როგორ უნდა გამოვკვებოთ სენიორ ასაკის ძაღლი.

- რა ასაკიდანაა მიჩნეული ძაღლი სენიორად?

ეს დამოკიდებულია ცხოველის ჯიშსა და წონაზე. დიდი ზომის ძაღლებს უფრო მალე ემატებათ ასაკი, ვიდრე პატარა ზომის.

ჯიშებს შორის სხვაობის გარდა არსებობს წონის მიხედვით სხვაობა, ჭარბწონიანი ძაღლები უფრო მალე ბერდებიან ვიდრე ნორმალური წონის მქონეები.

როგორც წესი, ძაღლის ასაკი განისაზღვრება მისი არსებობის წლებით, პატარა ჯიშის ძაღლები დაახლებით 15-20 წელი ცხოვრობენ, შედარებით დიდი ზომის ძაღლები კი 12 -15 წელი. დიდი ჯიშის ძაღლები სენიორ ჯგუფში გადადიან, როდესაც აღწევენ 6 წელს, ხოლო პატარა ჯიშის ძაღლები – 8 ან 9 წლის შემდეგ.

- სჭირდება თუ არა სენიორ ასაკის ძაღლებს სპეციალური კვება?

დიახ. არა მხოლოდ ასაკის მიხედვით, არამედ ზომის მიხედვითაც სენიორ ძაღლებს სჭირდებათ განსაკუთრებული კვება, მათი საკვები უნდა იყოს დაბალკალორიული, რადგან ამ ასაკის ძაღლები შედარებით ნაკლებ აქტიურები არიან, რაც ჭარბწონიანობას და მომნელებელი სისტემის პრობლემებს იწვევს.

ცხოველთა საკვების მწარმოებელი კომპანიები ყოველთვის ითვალისწინებენ ამას და ამზადებენ საკვების სპეციალურ ხაზს სენიორ ძაღლებისთვის, რომელიც შეიცავს ნაკლებ კალორიებს, ზოგიერთი მათგანი – მაგალითად Advance Senior ხაზი შეიცავს სპეციალურ დანამატებს, რომელიც უზრუნველყოფს ცხოველის ძვლოვანი სტრუქტურის განვითარებას და ახდენს სხვადასხვა დაავადებების პრევენციას, შერჩევისას გაითვალისწინე შეიცავს თუ არა ომეგა 3-ს. გარდა შემადგენლობისა საკვები გრანულების ზომა ზუსტად უნდა იყოს მორგებული ცხოველის ზომასა და ასაკზე, ადვილად უნდა იღეჭებოდეს.

თუ შენს ოთხფეხა მეგობარზე ზრუნავ, უნდა გაითვალისწინო მისი ასაკი და შესაბამისად კვებო. კატეგორიულად არ შეიძლება ლეკვის, ზრდასრული და სენიორ ასაკის ძაღლების ერთი და იმავე საკვებით გამოკვება, შესაძლოა ახლა ასე უფრო ეკონომიურია, თუმცა საბოლოო ჯამში უფრო ძვირი დაგიჯდება, რადგან ძაღლის დაავადების ალბათობა იზრდება.

როდესაც საქმე ძაღლის სასუსნაოებზე მიდგება, შენი ძაღლისთვის (თუ ის სენიორ ჯგუფშია) უნდა შეიძინო დაბალკალორიული, ჯანსაღი სასუსნავები, რომელიც ამავე დროს ასუფთავებს კბილებს. კვებით რაციონში შესაძლებელია ბოსტნეულის შეტანაც, ძაღლების უმეტესობას უყვარს სტაფილო და ვაშლი, მოარიდე ყურძენი ეს მისთვის ძალიან საშიშია.

სენიორ ასაკის ძაღლს ასევე სჭირდება ბევრი წყალი, წყლის დისბალანსი ორგანიზმში აჩქარებს დაბერების პროცესს, თუმცა იმის გამო, რომ ამ ასაკში ცხოველები ზარმაცდებიან, სასურველია სწორად შეურჩიო საკვები ჯამები, რათა არ დაეზაროს საკვებისა და წყლის მირთმევა. ყურადღება მიაქციე ჯამის სიმაღლეს და სიმყარეს.